Gikompirmar sa buhatan ni Mayor Felipe Antonio Remollo nga nahatag na ganinang buntag ang dugang ayudang pinansiyal para sa 446 ka pamilya gikan sa 23 ka barangays kansang mga panimalay naguba tungod sa Bagyong Odette niadtong Disyembre 16, 2021.
Giaprobahan ni Mayor Ipe Remollo ang paghatag ug dugang tag P 10, 000 kada usa sa 36 ka pamilya diin ang ilang panimalay “totally damaged” samtang tag P 5, 000 ang gihatag kada usa sa 410 ka pamilya nga ang mga panimalay “partially damaged” basi kini sa listahan ug pagpamatuod sa mga opisyales sa barangay ug City Social Welfare and Development Office.
Mokabat P 2.4 milyon ang gitagana nga pondo gikan sa lokal nga kagamhanan para sa dugang ayuda. Samtang kining mga biktima nakadawat na sauna ug ayuda gikan sa kagamhanang nasyonal nga mokabat ug tag P 1, 000 matag miyembro sa pamilya apan dili molapaw sa P 4, 000 matag pamilya nga nawad-an o naguba ang panimalay tungod sa Bagyong Odette.