Gibendisyonan na ang bag-ong natukod nga Technical Educational and Skills Development Authority Provincal Training Center-Dumaguete nga nahimutang dinha sulod sa Eco-Park ug MRF compound sa Barangay Candau-ay ganinang buntag.
Ang inaugurasyon gitambongan mismo ni TESDA Secretary Isidro Lapeña uban ni Mayor Felipe Antonio Remollo ug Vice-Mayor Karissa Tolentino-Maxino, Deputy Director General Lina Sarmiento, Chief-of-Staff Juliet Orozco, Regional Director Gamaliel Vicente Jr., ug Provincial Director Joel Villagracia.
Gilaoman ni Mayor Ipe Remollo nga ang pagbukas sa TESDA Provincial Training Center-Dumaguete liboan ka mga residente ang mahatagan ug ensakto nga pagbansaysay o skills training para sila makatrabaho dinhe o gawas sa nasod para makahatag ug maayong ugma sa ilang tagsa-tagsa ka pamilya.
Kahinumduman nga gipagamit sa kagamhanang siyudad sa Dumaguete ug 10, 000 square meters nga luna dinha sulod sa Eco-Park ang TESDA para tukuran sa provincial training center niini pinasubay sa Deed of Usufruct sulod sa 25 ka tuig.
(Photos from TESDA FB Page)