Giinagurahan ug gitugyan na sa DPWH ngadto sa kagamhanang siyudad ang pinakadako nga evacuation center human sa programa ug pagbendisyon sa bag-ong pasilidad dinha sa Barangay Talay.
Malipayon si Mayor Ipe Remollo ug mga opisyales nga nahuman na ug tukod ang pasilidad nga magamit sa mga lupyo ning siyudad para kapasilongan sa gatosan ka pamilya kung mobakwit panahon sa kalamidad sama sa baha o kung adunay sunog.
Nitambong usab sa inagurasyon ug blessing karung hapona sila DPWH Assistant Regional Director Atty. Mario Montejo, DPWH District Engr. Noli Alacantara, Bise-Mayor Faye Karissa Tolentino-Maxino, Konsehal Michael Bandal, Konsehal Lilani Ramon, Konsehal Edgar Lentorio Jr., Konsehal Manuel Patrimonio ug mga kadagkoan sa kagmahanang siyudad.
Kining evacuation center nga nikostar ug P 36 milyones adunay 106 ka mga cubicles, mga banyo, halapad nga kusina ug kalan-an, lawak para sa mga managtiayon, dulaanan sa mga bata, lawak para ampoan, mga buhatan, parking area ug kaugalingong Materials Recovery Facility (MRF).