Nagpadayun ang City Health Office sa adlaw-adlaw ug house-to-house nga pagbakuna sa mga residente batok COVID-19 nga maglisod ug adto sa vaccination centers pinasubay sa mando ni Mayor Ipe Remollo para magpabiling luwas ang katawhan ug atong komunidad.
Matud ni City Health Officer Dr. Maria Sarah B. Talla, usa ka team kini naglakip sa doktor, nurse ug BHW ang moadto sa mga barangay ug balay-balay para bakunahan ilabi na kadto mga senior citizens, PWDs ug mga residente nga dili gyud makahigayon ug adto sa vaccination center ning dakbayan.
Kadtong interesado nga anhaon sa ilang mga panimalay para bakunahan gi-awhag nga modool lang sa mga opisyales sa barangay ug mga BHW para magpalista ug pahibal-on lang unya sa ilang schedule.
Bisan pa kung wala nay kaso sa COVID-19 ang siyudad sa Dumaguete nagpahimangno gihapon si Mayor Ipe Remollo sa katawhan nga kanunay nga magbinantayon ug motuman sa tanang health protocols para mapabilin nga luwas batok COVID-19.