Malipayong gidawat ni Mayor Felipe Antonio “Ipe” Remollo ang mga titulo sa luna ubos sa pangalan sa kagamhanang siyudad sa Dumaguete para mahimong tukoran na sa mga kabalayan sa mga biktima niadtong bagyong Sendong para adunay na silay permanenteng kapuy-an nga luwas sa baha ug katalagman.
Gitunol ni National Housing Authority District Manager Claire de Lune P. Villanueva, isip representante ni NHA General Manager Marcelino P. Escalada Jr., ang mga titulo sa luna ug development plans ngadto kang Mayor Remollo para mapatuman na ang pagtukod sa Banilad Plains View nga pormal na nga nabalhin ang pagpanag-iya ug katungod sa luna ngadt sa kagamhanang siyudad.
Matud ni Mayor Ipe Remollo nga ubos sa plano, ang 403 ka lote sulod sa 3.7 ka ektarya nga luna kini tukuran ug mga kabalayan, dalan, parke, playground, day care center, parking space, Materials Recovery Facility, terminal sa traysikel ug community police station lakip na nga andam ang kuryente ug tubig para sa mauswagon ug limpyo nga pinuy-an sa mga kanhi biktima sa Sendong.
Nagpasalamat usab si NHA District Manager Claire de Lune P. Villanueva kang Mayor Ipe Remollo sa iyang paningkamot ug suporta sa proyekto nga pabalay lakip nga sa konseho tungod sa pag-aprobar sa mga resolusyon, ang pamilyang Tale nga nidonar sa ilang luna (3, 632 square meters) para road-right-of-way, Kapitan Maquiling, Konsehal Amores, sa PhilSouth Builders Incorporated tungod sa ilang trabaho para ma-andam ang luna ug sa mga empleyado sa NHA nga niproseso sa mga papeles uban ang City Legal Office.
Lakip sa nitambong sa seremonya karung hapona mao sila Bise-Mayor Karissa Tolentino-Maxino, Konsehal Edgar Lentorio Jr., Konsehal Lilani Ramon, Konsehal Manuel Patrimonio, Liga ng mga Barangay President Dionie Amores, Purok Lunoy President Franklin Tanilon nga representate sa mga biktima sa Bagyong Sendong nga anaa karon temporary gapuyo sa Barangay Junob, kanhi City Legal Officer Manuel Arbon, Banilad Barangay Captain Pacencio Maquiling ug mga kauban niyang opisyales, mga department heads sa kagamhanang siyudad ug mga residente nga galibot sa luna.