Pinasubay sa mando ni Mayor Ipe Remollo nagpadala gilayon ug tabang ang City Social Welfare Office ug City Health Office sa mga biktima sa sunog dinha sa Barangay Bantayan sugod kagahapong adlawa ug giproceso na ang dugang financial assistance matag apektado nga pamilya.
Matud ni City Social Welfare and Development Officer Lilibeth Filpinas nagpadala sugod gahapon ug ayuda sa pagkaon, used clothing, blankets, hygiene kits, food packs para magamit sa mga biktima sa sunog.
Usa ka community kitchen usab ang gitukod uban ni Kapitan Nerio Grapa para moluto sa mga pagkaon sa mga biktima samtang giproceso usab ang ilang financial assistance dinha sa buhatan ni Mayor Remollo.
Basi sa taho, 14 ka pamilya ang apektado (61 ka indibdwal) diin 8 ang totally damaged ug 3 ka partially damaged nga mga balay. Aduna usab 3 ka pamilya nga house sharers nga nagrenta sa mga balay.
Samtang si City Health Officer Dr. Maria Sarah B. Talla nagpadala usab ug medical team sa mga nasunogan gahapon para matambalan ang adunay injuries.
Nibalik usab sila ni Dr. Talla para mopahigayon ug konsulta ug mohatag sa tambal ug bitamina sa mga biktima.