Gikalipay sa mga lupyo sa Barangay Bajumpandan human nila matino nga sugdan na usab ug tukod ang laing balay tambalan o Super Family Clinic dinha sulod sa E.C. Ouano Sr. Complex human gipahigayon ang ground breaking ceremony kagahapong adlawa nila Mayor Felipe Antonio Remollo, mga opisyales sa kagamhanang siyudad ug mga representante sa Department of Health.
Dako usab ang pasalamat nila Mayor Ipe Remollo ug City Health Officer Dr. Maria Sarah B. Talla sa Department of Health nga girepresentahan ni Provincial DOH Officer of Negros Oriental/Siquijor Jennifer C. Remollo ug Senior Project Manager Engr. Wilnar Miole tungod sa dugang proyekto panglawas ning siyudad.
Ang P 15-milyones nga Super Family Clinic kini adunay mga pasilidad ug serbisyong medikal sama sa birthing room, x-ray room, minor surgical room, clinical laboratory, ultra-sound area, ECG area, dental clinic, pharmacy ug 2-bed ward.
Subling gipalanog ni Mayor Remollo nga kining Super Family Clinic makahatag ug serbisyong medikal ug benepisyo sa mga residente dili lang sa Barangay Bajumpandan apan lakip na gikan sa mga sikbit nga barangay sama sa Talay, Junob, Balugo, Batinguel, Candau-ay, Cadawinonan, Camanjac, Cantil-e ug Bajumpandan.
Dugang pa ni Mayor Remollo nga andam usab ang luna nga tukoran sa Provincial Health Office sa DOH tapad rapod sa Super Family Clinic.
Samtang nabuksan na ug una ang bag-ong balay tambalanan sa Barangay Talay gahapong adlawa gawas usab nga ang pagtukod sa City Hospital kini ipadayun para sa mas halapad ug dugang programa nga galmon ang maayong panglawas sa katawhan.
Lakip sa mga nitambong sa kalihokan gahapong adlawa mao sila Bise-Mayor Karissa Tolentino-Maxino, mga Konsehales Michael Bandal, Edgar Lentorio Jr., Manuel Patrimonio, Dionie Amores, kanhi Bise-Mayor Woodrow Maquiling Sr., mga kapitan sa barangay ug department heads sa kagamhanang siyudad.