Bukas ug andam na nga mohatag ug serbisyong medikal ang City Health Office 2 (Satellite Clinic) nga gi-inagurahan karung adlawa ni Mayor Felipe Antonio “Ipe” Remollo uban sa mga representante sa Department of Health dinha sa Barangay Talay.
Matud ni Mayor Ipe Remollo kining bag-ong balay tambalanan nga gibendisyonan pod sa simbahan puede nga dalangpan sa mga lupyo gikan sa Barangay Talay, Junob, Balugo, Batinguel, Candau-ay, Cadawinonan, Camanjac, Cantil-e ug Bajumpandan kung manihanglan magpa konsulta, magpatambal ug manganak tungod kay aduna kini mga ekwipo, doktor, nars, midwife ug BHW isip pagtuman sa iyang saad nga dad-on ang serbisyong medikal dool sa mga kabarangayan.
Nagpsalamat si City Health Officer Dr. Maria Sarah B. Talla sa Department of Health nga representahan ni Provincial DOH Officer of Negros Oriental/Siquijor Jennifer C. Remollo ug Senior Project Manager Engr. Wilnar Miole sa DOH Region 7 tungod sa ayuda pagapatukod sa pasilidad ug ni Mayor Ipe Remollo nga nigahin ug pondo para pagpalit sa mga ekwipong medikal ug pagtudlo ug dugang doctor, nurse ug BHW nga maoy mopadalagan sa bag-ong balay tambalanan.
Nipadayag usab ug pasalamat si Mayor Ipe Remollo sa DOH tungod sa padayun niini nga ayuda pagpatuman ug mga proyekto sa Dumaguete City sama sa bag-ong balay tambalanan dinhe sa Barangay Talay, pagtukod unya sa Super Family Clinic sa Barangay Bajumpandan ug dugang pondo para matukod ang usa ka City Hospital dinhe usab sa Barangay Talay nga gisugdan na sa kagamhanang siyudad.
Lakip sa nitambong sa inagurasyon sa balay tambalanan karung adlawa sila Bise-Mayor Karissa Tolentino-Maxino, mga Konsehales Michael Bandal, Edgar Lentorio Jr., Manuel Patrimonio, Dionie Amores, kanhi Bise-Mayor Woodrow Maquiling, mga kapitan sa barangay ug department heads sa kagamhanang siyudad.
Mapasalamaton ang mga lupyo sa Barangay Talay ug mga silingang barangay nga natukod ug bukas ang bag-ong balay tambalan nga moserbisyo kanila.