Subay sa mando ni Mayor Ipe Remollo nga serbisyohan ang mga residente nga lisod makaadto sa vaccination centers, mga health workers gikan sa City Health Office ang gipadala para mopahigayon ug house-to-house nga pagbakuna batok COVID-19.
Matud ni City Health Officer Dr. Maria Sarah B. Talla, usa ka team kini naglakip sa doktor, nurse ug BHW ang moadto sa mga barangay ug balay-balay para mopahigayon sa pagbakuna ilabi na kadto mga senior citizens, PWDs ug mga residente nga dili gyud makahigayon ug adto sa vaccination center ning dakbayan.
Kadtong interesado nga anhaon sa ilang mga panimalay para bakunahan gi-awhag nga modool lang sa mga opisyales sa barangay ug mga BHW para magpalista ug pahibal-on lang unya sa ilang schedule.
Samtang nagpadayun ang pagbakuna sa mga kabataan (5-11 anyos) dinha sa Robinson Place Dumaguete ug dinha sa Foundation University Gymnasium para sa mga batan-on (12-17 anyos) ug sa mga hamtong matag Lunes hangtod Biernes sa 8:00AM-5:00PM.
Tungod sa taas nga vaccination rate dinhe sa dakbayan sa Dumaguete, gani pinakataas sa tibook Central Visayas diin 129% sa target nga populasyon nga mokabat ug 139, 248 ka mga lupyo ug trabahante ang nabakonahan ug tungod sa maba nalang nga aktibo nga kaso sa COVID-19, gipailalom na sa mas luag nga Alert Level 1 ang dakbayan basi sa deklarasyon sa National Inter-Agency Task Force for the Management of Emerging Infectious Diseases.
Apan gi-awhag gihapon ni Mayor Ipe Remollo ang katawhan nga kanunay nga magbinantayon ug motuman sa tanang health protocols para mapabilin nga luwas batok COVID-19.