Mga kapitan nga lakip sa nitambong sa inagurasyon sa Material Recovery Facility (MRF) dinha sa Barangay Candau-ay nagpasalamat kang Mayor Ipe Remollo tungod sa pagsirado sa kapin 30-anyos na nga dumpsite niadtong pang usang tuig (Marso 30, 2021) ug pagtukod sa usa ka MRF nga karun gidayeg sa kadagkoan sa Department of Environment and Natural Resources o DENR.
Matud sa mga kapitan, hapit usa na ka tuig karun nga nasinati nga mas hapsay, limpyo ug himsog na ang mga lupyo dinha sa Barangay Candau-ay ug Balugo tungod kay sirado na ang dumpsite, walay baho, walay aso ug ga operate napod ang MRF diin ang mga basura gikolekta sa tibook siyudad kini giproseso para mahimong hollow blocks ug pavers nga magamit sa mga proyektong imprastraktura; plastic chairs para sa mga tunghaan ug abono nga magamit sa mga mag-uuma.
Lakip sa mga Kapitan nga nahinabi ug nipadayag ug suporta mao sila Kapitan Gregorio Oira sa Candau-ay, ABC Liga President Dione Amores sa Motong, Kapitan Glenn Noay sa Balugo, Kapitan Virginia Alcancia sa Camanjac, Kapitan Frankie Credo sa Batinguel, Kapitan Gina Ablay sa Buñao, Kapitan Vincent Perigua sa Bagacay ug Gerardo Balog sa Poblacion 6.
Atol sa inagurasyon sa MRF niadtong Huebes nipadayag usab sa ilang kusganong suporta sa programa ni Mayor Ipe Remollo sila Engr. Paquito D. Melicor Jr., Regional Executive Director, DENR Region 7 ug Engr. William P. Cuñado, Director, DENR-EMB Central Office.
Dugang ni Director Cuñado, hatagan ug pasidungog sa DENR si Mayor Ipe Remollo ug mga kauban niya sa Konseho tungod sa pagbaton ug usa ka MRF nga nakasolbad sa problema sa basura, kini ang nagbinugtong nga MRF sa tibook Pilipinas nga nakahatag usab ug dugang income sa kagamhanang siyudad ug trabaho sa mga scavengers.
Gideklarar ni Director Cuñado sa DENR nga ang dakbayan sa Dumaguete karun ang adunay best technology in Solid Waste Management tibook nasud nga Pilipinas.
Samtang ang sirado nga dumpsite kini gipailalom sa rehabilitasyon kay plano ni Mayor Ipe Remollo nga kung hingpit na nga mawala ang karaan nga basura kining bakante luna unya puede mahimong parke, butangan ug mga pasilidad ug pabalay depende sa mamahimo unya nga rekomendasyon sa mga awtoridad. (Interview by Choy Gallarde)