Dugang duha [2] ka barangay ang takdang hatdan sa ayudang bugas sa mga tinugyanan sa buhatan ni Mayor Ipe Remollo karung Huebes ug Biernes basi sa kompleto ug certified nga listahan sa mga tagbalay nga gisumiter sa ilang mga opisyales sa barangay.
Mao kini 2 ka barangay nga hatdan sa tag 20 kilos nga ayudang bugas kada panimalay sugod alas-9 ang takna sa buntag:
BANTAYAN – Huebes [Marso 24] Barangay Hall
CAMANJAC – Biernes [Marso 25] Covered Court
Matud ni Mayor Remollo ang paghatag sa ayuda bugas gikan sa kagamhanang siyudad dugang tabang karung panahon sa krisis tungod sa COVID-19.
Samtang mga lupyo sa Barangay Banilad ang mapasalamaton kay nadawat na nila ang ayuda karung adlawa.
Mga opisyales sa Barangay Bantayan ubos sa pagpangulo ni Kapitan Nerio Grapa ug Barangay Camanjac pinangulohan ni Kapitan Virginia Alcancia ang motabang para hapsay ug luwas ang pag apod-apod sa ayudang bugas sa ilang mga tagbalay.
Human niining duha ka barangay, kompleto na nga nahatagan ang 30 ka barangays nga milangkob sa Dumaguete sa ayudang bugas sa ika-7 nga higayon sukad nagsugod ang pandemya sa COVID-19.
Nagpasalamat usab ang buhatan ni Mayor Ipe Remollo sa mga opisyales sa barangay sa ilang kooperasyon para mahatdan ang mga tagbalay sa ilang bahin.