Nadawat na karung adlawa ang ayudang pinansiyal sa 399 ka mangingisda ug mag-uuma kansang mga umahan ug panagatan nakaangkon ug kadaot tungod sa Bagyong Odette dinha sa ilang tagsa-tagsa ka barangay.
Giaprobahan ni Mayor Ipe Remollo ang paghatag sa ayudang pinansiyal sa dugang 399 ka pamilya sa mag-uuma ug mangingisda pinasubay sa rekomendasyon ug listahan nga gisumiter ug gipamatud-an sa mga opisyales sa barangay ug agricultural technicians.
Pinasubay sa patakaran ubos sa Local Budget Circular No. 141, 3.4 gikan sa Department of Budget and Management tag usa ka libo (P 1, 000) kada indibidwal nga miyembro sa pamilya apan dili molapas sa tag P 5, 000 (pasabot kutob lang sa 5 ka indibidwal) ang pwedeng ihatag sa kada apektado nga pamilya.
Mga tinugyanan sa DILG, Department of Social and Development Office ug City Agriculture Office ang hugtanon nga nimonitor sa paghatag sa ayudang pinansiyal.
Subling gipasabot nga katong adunay pangutana kabahin sa listahan ug uban pang mga pagpatin-aw moadto lamang sa ilang mga opsiyales sa barangay, agricultural technicians ug social workers para kini matubag ug masabtan.