Ika-duha nga batch, isip dugang mga mag-uuma ug mangingisda kansang mga umahan ug panagatan kini nakaangkon ug danyos tungod sa Bagyong Odette niadtong Disyembre 16, 2021 ang hatagan ug ayuda pinansiyal ugmang adlawa, Lunes.
Gimando ni Mayor Ipe Remollo nga ihatag na ang ayuda sa mga mag-uuma ug mangingisda ugmang adlawa sa tagsa-tagsa nila ka barangay hall basi sa listahan nga gigama ug gipamatud-an sa mga opisyales sa mga barangay ug agricultural technologists.
Isip pagsanong sa patakaran ubos sa Local Budget Circular No. 141, 3.4 gikan sa Department of Budget and Management tag usa ka libo (P 1, 000) kada indibidwal nga miyembro sa pamilya apan dili molapas sa tag P 5, 000 (pasabot kutob lang sa 5 ka indibidwal) ang pwedeng ihatag sa kada apektado nga pamilya.
Kining paghatag sa ayuda hugtanon nga imonitor sa Department of Interior and Local Government ug Department of Social Welfare and Development.
Sa mga adunay pangutana kabahin sa listahan ug uban pang mga pagpatin-aw moadto lamang sa ilang mga opsiyales sa barangay, agricultural technologists ug social workers para kini matubag ug masabtan sa mga hingtungdan.