Gimando ni Mayor Ipe Remollo nga ihatag na karung semanaha ang tag P 500 nga ayuda kada usa sa 35, 000 ka kabus nga pamilya, senior citizens ug Persons with Disabilities gikan sa 30 ka barangay ning siyudad sa Dumaguete.
Ang listahan sa mga hatagan ug tag P 500 kini gikan sa mga opsiyales sa barangay ug City Social Welfare and Development Office nga maoy gitahasan ubos sa programa nga mosumiter sa listahan sa mga mas labing naapektahan sa pandemya sa COVID-19.
Kining ayuda nga tag P 500 ihatag samtang gapadayun usab ang paghatod sa tag 20 kilos nga bugas matag panimalay sa nahibiling pang mga barangay.
Kahinumduman nga giaprobahan sa konseho ning siyudad ang gipangayo ni Mayor Ipe Remollo nga P 17.5 milyones nga pondo gikan sa atong lokal nga panudlanan para sa 35, 000 ka mga residente nga mas labing naapektohan sa pandemya sa COVID-19 sama sa mga kabus nga pamilya, senior citizens ug mga PWDs.