Na konkreto ug andam na ang dalan nga galibot sa dakong luna nga tukuran unya sa gisugyot nga satellite market, South Bus Terminal, Super Family Clinic, buhatan sa Department of Health ug uban pang mga pasilidad dinha sa Barangay Bajumpandan alang sa mga katawhan dinha sa upper barangays sama sa Talay, Junob, Balugo, Batinguel, Candau-ay, Cadawinonan, Camanjac Cantil-e ug Bajumpandan.
Matud ni Mayor Ipe Remollo kining bag-ong nahuman nga dalan masumpay unya sa Metro Dumaguete Diversion Road isip alternatibo nga rota para mas hapsay ug luwas ang pagbiyahe unya sa mga produkto, motorista ug serbisyo nga makapalambo usab sa mga negosyo.
Kining pag-ugmad sa luna nga gidonar sa pamilya sa mga Ouano sa kagamhanang siyudad isip suporta sa paningkamot sa administrasyon ni Mayor Ipe Remollo para mahatagan ug mga oportunidad, panginabuhian ug kauswagan ang mga katawan dinha sa upper barangays nga nahisubay sa Master Plan sa Dumaguete.