Mga tinugyanan sa City Social Welfare and Development Office ug mga opsiyales sa barangay ang takdang mo apod-apod sa ayudang pinansiyal ugmang adlawa ngadto sa 598 ka pamilya kansang mga balay ug umahan naguba tungod sa Bagyong Odette niadtong Disyembre 16, 2021.
Ang buhatan ni Mayor Felipe Antonio “Ipe” Remollo mikompirmar nga ang pag apod-apod sa ayudang pinansiyal kini ipahigayon sa mga Barangay Hall ugmang adlawa (Pebrero 24) sugod alas-9:00 ang takna sa buntag ug kini hugtanon nga imonitor sa Department of Interior and Local Government ug Department of Social Welfare and Development.
Matud ni City Social Welfare and Development Officer Lilibeth Filipinas mokabat sa P 2, 373, 000 ang gidownload nga pondo gikan sa kagamhanang nasyonal ngadto sa LGU diiin kini ihatag sa mga pamilya nga naguba ang mga balay ug umahan.
Pinasubay sa patakaran ubos sa Local Budget Circular No. 141, 3.4 gikan sa Department of Budget and Management tag usa ka libo (P 1, 000) kada indibidwal nga miyembro sa pamilya apan dili molapas sa tag P 5, 000 (pasabot kutob lang sa 5 ka indibidwal) ang pwedeng ihatag sa kada pamilya.
Ang listahan sa mga naila nga mga biktima sa Bagyong Odette diin naguba ang ilang mga balay ug umahan tungod sa Bagyong Odette giandam ug gipamatud-an sa mga social workers, agricultural technologists ug opisyales sa mga barangay para matabangan ang mga biktima nga mapaayo ang ilang mga naguba nga panimalay ug matabangan ang panginabuhian sa mga mag-uuma nga nawad-an sa ilang mga produkto.
Sa mga adunay pangutana kabahin sa listahan ug uban pang mga pagpatin-aw moadto lamang sa ilang mga opsiyales sa barangay, agricultural technologists ug social workers para kini matubag ug masabtan.