Mga tagbalay sa Barangay CALINDAGAN ang hatdan ug tag 20 kilos nga ayudang bugas sa mga tinugyanan sa buhatan ni Mayor Ipe Remollo ugmang adlawa (Biernes).
Ang mga opisyales sa maong barangay ubos sa pamunoan ni Kapitan Maisa Sagarbarria ang motabang para hapsay ug luwas ang pag apod-apod sa ayuda nga ipahigayon sa Barangay Hall sugod alas-9 ang takna sa buntag.
Matud ni Mayor Remollo kining paghatag sa tag 20 kilos nga bugas kada panimalay kini padayon nga tabang karung panahon sa krisis ug ang gibasihan mao ang lista gikan sa mga hingtungdan nga barangay.
Samtang mga lupyo sa Barangay CADAWINONAN mapasalamaton usab sa kagamhanang siyudad uban ni Kapitan Jimmy Tabada kay nadawat na nila ang ayuda gahapong adlawa.
Gi-awhag ang mga residente sa ubang barangay nga maghulat sa tukmang pahibalo gikan sa ilang mga opisyales kung kanus-a ang petsa sa pagpanghatag sa ayuda.
Kini ang ika-unom (6) hugna nga ayudang bugas gikan sa kagamhanang siyudad para sa mga lupyo sa Dumaguete tungod sa pandemya sa COVID-19.