Mga tagbalay sa Barangay BANILAD ang hatdan ug tag 20 kilos nga ayudang bugas sa mga tinugyanan sa buhatan ni Mayor Ipe Remollo ugmang adlawa (Huebes).
Ang mga opisyales sa maong barangay ubos sa pamunoan ni Kapitan Pacencio Maquiling ang motabang para hapsay ug luwas ang pag apod-apod sa ayuda nga ipahigayon sa Covered Court.
Matud ni Mayor Remollo kining paghatag sa tag 20 kilos nga bugas kada panimalay isip padayun nga tabang karung panahon sa krisis ug ang gibasehan mao ang lista gikan sa hingtungdan nga barangay.
Samtang mga lupyo sa Barangay TABUC-TUBIG mapasalamaton usab sa siyudad uban ni Kapitan Randy Fausto kay nadawat na nila ang ayuda karung adlawa.
Gi-awhag ang mga residente sa ubang barangay nga maghulat sa tukmang pahibalo gikan sa ilang mga opisyales kung kanus-a ang petsa sa pagpanghatag sa ayuda.
Kini ang ika-unom (6) hugna nga ayudang bugas gikan sa kagamhanang siyudad para sa mga lupyo sa Dumaguete tungod sa pandemya sa COVID-19.