Gikompirma ni Mayor Ipe Remollo nga mga trabahante, sakyanan og water tank sa kagamahanang siyudad sa Dumaguete ang gipadala didto sa Bais City para maghatod sa relief goods ug ilimnong tubig para sa mga biktima sa Bagyong Odette.
Samtang nakigpulong si Mayor Remollo kang Bise Presidente Leni Robredo para sa dugang nga ayuda nga mahatag isip pagsanong sa panawagan nga magtinabangay ang mga katawhan ug organisasyon para mahatagan ug hinabang ang mga naigo sa katalagman nga mikalas sa ubay-ubay nga kinabuhi ug niguba sa daghang kabtangan didto sa norte.
Dugang pa ni Mayor Remollo nga laing bus ug water tanker sa kagamhanang siyudad ang ipadala didto sa Bais ug sa uban pang mga lungsod ugmang adlawa para mas daghan pa ang mahatagan sa ayuda.
Ang siyudad sa Dumaguete bisan pa ug naigo sa Bagyong Odette apan dili halapad ang kadaot nga nahiagoman tungod usab kay gipabakwit na daan ni Mayor Remollo ang mga residente nga gapuyo daplin sa baybay ug suba para malikay sa disgrasya uban sa pagpaningkamot ug pagpangandaman sa mga opisyales sa barangays, CDRRMO, City Health Office, Dumaguete PNP, Dumaguete BFP, General Services Office, City Engineer’s Office, Deped Dumaguete, CSWDO ug uban pang mga ahensiya.
Busa matud ni Mayor Remollo, sama ni Bise Presidente Leni Robredo, usa ka misyon karun sa siyudad sa Dumaguete nga mohatag ug ayuda, kutob sa mahimo, para sa mga biktima ni bagyong Odette.
(Video courtesy Noel Mokong Ramirez)