Human gipasirado ni Mayor Ipe Remollo ang Candau-ay dumpsite niadtong Marso 31, 2021, nipalit ang kagamhanang siyudad ug mga bag-o nga ekwipo para mas paspas ug hapsay ang paghipos sa mga basura dinha sa Materials Recovery Facility o MRF.
Lakip sa mga bag-ong ekwipo nga napalit mao ang usa ka hydraulic excavator, payloader, 2 ka 6-wheeler dump truck, 3 ka Mini dump truck ug usa ka hydraulic bailer machine nga ginagamit dinha sulod sa Eco-Park Solid Waste Processing Facility.
Tanang mga basura gikan sa mga kabalayan ug establisyemnto sa tibook siyudad kini ginadala dinha sa MRF para bahigon ug mahipos.
Human gipatuman ni Mayor Ipe Remollo ang pagsirado sa Candau-ay dumpsite, iya usab nga gipatrabaho ang mga kanhi naningabuhian dinha sa karaang dumpsite isip mga empleyado sa siyudad diin sila ang magbahig sa mga nakolekta nga basura para mahimong fertilizer; irecycle ang mga mapuslan pa nga plastic, botelya, lata, carton ug uban pa samtang ang mga dili mapuslan kini dad-on didto sa Bayawan sanitary landfill.
Subling gipangayo ang kooperasyon sa katawhan para mapalungtad ang kalimpyo sa atong palibot, malikayon ang pagsampong sa mga basura sa atong mga drainage canal ug mahinlo ang atong kalikopan para magpabilin himsog ang katawhan.