Pinasubay sa mando ni Mayor Ipe Remollo, tukuron ang usa ka kongkretong taytayan nga magsumpay sa Barangay Batinguel ug Junob sunod tuig 2022 human nagahinan na ug pondo nga balor P 25 milyones.
Kining bag-ong taytayan ang mopuli sa karaan nga footbridge dinha sa Batinguel-Junob para masiguro ang luwas nga pagbyahe sa mga motorista ug maproteksyunan ang mga lupyo kilid sa Banica River ilabi na panahon kung adunay baha.
Matud ni Mayor Remollo kining bag-ong taytayan sa Batinguel-Junob lapad ug taas kini para dili malapawan sa tubig baha.
Samtang dungan nga tukuron karung sunod tuig ang taytayan nga magsumpay sa Candau-ay ug Balugo para mailisdan ang spillway dinha sa nasirado na nga dumpsite.
Bag-o lang nahuman karung tuiga ang 2 ka taytayan nga gasumpay sa Batinguel-Bagacay duol sa BIR ug laing taytayan gasumpay sa Taclobo-Bagacay diin mas luwas na ang mga lupyo daplin sa Banica ug hamugaway na ang pagbiyahe sa mga motorista samtang namenusan usab ang gibug-aton sa trapiko sa siyudad.