Giinspeksyon ug gitestingan sa mga tinugyanan sa Technical Working Group ug City Bids and Awards Committee gipamunoan ni City Legal Officer Manuel Arbon ang mga makina para sa Pyrolysis Gasification Process nga gitaod dinha sa Central Materials Recovery Facility para masiguro nga dekalidad ug andam na kini nga gamiton.
Human gipasirado ni Mayor Ipe Remollo ang karaang open dumpsite dinha sa Candau-ay niadtong Marso 30, 2021, hugtanan nga gidili na ang paglabay didto ug basura ug kini gidala na tanan sa Central Materials Recovery Facility sulod sa 8 ka ektarya nga Eco-Park Solid Waste Processing Facility diin gimontar usab ang mga makina sa pyrolysis para ang tanang basura nga dili malata ug mapuslan maproseso ug mahimong mga hollow blocks ug pavers nga magamit sa mga nagkadaiyang infrastructure projects sa kagamhanang siyudad lakip ang pagmintinar sa mga sementado nga kadalanan.
Samtang ang mga basura nga malata kini usab himoon nga organic fertilizer nga gamiton sa mga mag-uuma.
Gipatrabaho usab ni Mayor Remollo ang mga kanhi mangoykoy ug basura sa Candau-ay dumpsite dinha sulod sa Central Materials Recovery para dili sila mawad-an ug panginabuhian nga isuporta sa ilang mga pamilya.