Subling nakigtagbo ang mga opisyales sa kagamhanang siyudad sa Dumaguete sa mga Kapitanes ug residente sa Barangay Mangnao ug Banilad para ipadayun ang inspeksyon ug pagpinal sa plano aron ipatuman ang proyekto para masulbad ang pagbaha dinha sa Banilad-Mangnao national highway.
Gikompirma ni Konsehal Lilani Ramon nga adunay pondo nga gigahin si Mayor Ipe Remollo nga mokabat P 8 milyones para masugdan ang proyekto ug kini dugangan pa ilabi na kung motabang ang DPWH.
Apil sa proyekto ang pagtukod ug mga boulder walls para mosubay sa naandan nga agianan ang dakong bul-og sa tubig nga gagikan sa Valencia paingon sa Lagnasan Creek para diretso na ug tupa sa Ihalason Beach ang tubig baha ug dili na moawas sa mga kadalanan ug kabalayan.
Lakip sa nitambong sa coordination meeting gahapon adlawa dinha sa Banilad mao sila Konsehal Manuel Patrimonio, Manuel Sagarbarria, City Engineer Edwin Quirit, City Planning and Development Officer Leonides Caro, Kapitan Pacencio Maquiling sa Banilad ug Kapitan Ramel Tayko sa Mangnao uban sa ilang mga ginsakpan.
Ang mga opisyales sa barangay motabang ug negosasyon sa mga tag-iya sa luna ug kabalayan nga lagmit maapektohan sa proyekto para masulbad ang suliran sa baha dinha sa Banilad-Mangnao national highway.