Gipamatud-an sa talaan dinha sa Fish Terminal sa dakbayan sa Dumaguete nga ang mas dakong bulto sa suplay sa isda nga moabot ug nilibo ka kilos kada adlaw kini gagikan sa nagkalain laing lungsod sa probinsiya sa Negros Oriental ug sa Mindanao.
Kini nga kasayuran gipaambit atol sa pulong-pulong sa mga taga merkado publiko niadtong nilabay nga semana uban ni Mayor Ipe Remollo para matuki ang mga kalamboan ug proyekto alang sa mga lupyo ug nagkalain laing sektor ning siyudad.
Lakip sa nahisgotan sa pulong mao ang plano nga pag-ayo sa kasamtangang merkado publiko, pagtukod ug satellite market sa Bajumpandan ug ang 174-hectare nga Smart City Project para dugang trabaho ug mas moasenso ang panginabuhian sa katawhan sa siyudad lakip na ang mga manindahay dinha sa merkado publiko.
Giklaro ni Market Administrator Engr. Ronnie Fortin nga ang liboan ka kilo sa isda nga konsumo ning dakbayan matag adlaw gikan kini sa mga lungsod sa Bayawan, Basay, Bonawon Siaton, Bais, San Jose, Amlan, Surigao, General Santos City ug Zamboanga.
Adunay isda usab nga gagikan sa kabaybaynon ning dakbayan apan kini gamay lang ug dili kaigo sa panihanglanon sa mga lupyo.
Sagad sa mga isda nga ihandos sa merkado publiko mao ang manolsog, tolingan, bangus, tarugho, manalangsi, ihalason, tamarong, tuloy, tugnos, panit ug uban pa.
Gipasalamatan usab ni Mayor Ipe Remollo ang mga taga merkado publiko tungod sa ilang suporta sa mga infrastructure projects nga gi-implementar sa iyang pamunoan sama sa:
1. Pagtukod sa duha ka konkretong taytayan (Taclobo-Bagacay dinha sa Colon ug Batinguel-Bagacay dapit sa BIR)
2. Duha ka multi-purpose buildings para mahimong vocational schools
3. Pagtukod sa satellite hospital sa Barangay Talay
4. Pagsirado sa Candau-ay dumpsite niadto pang Marso 2021
5. Pagtiwas sa Metro Dumaguete Diversion Road
6. Pagtukod sa People’s Park dinha sa Pantawan 2
7. Housing Project para sa biktima sa bagyong Sendong
8. Pagtukod ug mga setback sa mga pampublikong eskwelahan para dugang parking area
9. Evacuation center dinha sa Talay diin kaya silongan sa gatosan ka pamilya panahon sa kalamidad
10. Pagtukod ug satellite market lakip south bus terminal dinha sa Bajumpandan
Kini ug uban pang mga proyekto gipaningkamotan sa administrasyon para sa mas malungtaron nga kalamboan karun ug sa umaabot pang henerasyon.