Nisalmot sa gipahigayon nga pulong-pulong kabahin sa 174-hectare Smart City Project karung adlawa ang mga manindahay ug stall holders sa merkado publiko uban ni Mayor Ipe Remollo para mas mapasabot sila sa tumong ug proseso sa maong proyekto.
Subling gipalanog ni Mayor Ipe Remollo nga ang katukuran sa Smart City Project kini magpaabot sa pagtugot ug musobay sa ensakto ug legal nga proseso sa mga ahensiya sa kagamhanan labi na dinha sa Philippine Reclamation Authority ug Department of Environment and Natural Resources para masiguro nga dili madaot ang kalikupan.
Sa pagtukod palang unya sa Smart City kini magkinihanglan na ug mga trabahante ug makahatag ug dugang oportunidad sa mga gagmay nga negosyante ug mga panginabuhian alang sa mga lupyo ning siyudad.
Gipanglantawan nga mas mabulahan ang kadaghanan kung mahinayon ang katukuran sa Smart City Project para sa mas progresibo nga siyudad sa Dumaguete ug probinsiya sa Negros Oriental.
Dugang pulong-pulong ang ipahigayon para mapaminaw ug matubag ang mga pangutana, kahingawa ug suhestiyon sa katawhan kabahin sa proyekto.