Subling nikubra ang mga kwalipikadong Barangay Tanod sa ilang cash incentives nga tag P 2, 100.00 kada usa dinha sa City Treasurer’s Office alang sa mga bulan Abril-Mayo-Hunyo 2021.
Ang cash incentive nga gipatuman ni Mayor Ipe Remollo sukad pa sa nilabay nga tuig ug gikuha gikan sa gahin sa kagamhanang siyudad gihatag sa mga kwalipikadong tanod sa 30 ka mga barangays ning dakbayan.
Gipatuman ni Mayor Remollo ang programa nga mohatag ug cash incentives nga tag P 700 matag Barangay Tanod kada bulan sa tanang 30 ka barangay isip dugang benepisyo tungod sa ilang panerbisyo para magpatunhay sa kahusay ug kalinaw sa tagsa-tagsa nila ka mga komunidad ilabi na karon sa panahon sa pandemya sa COVID-19.
Apan para mahimong kwalipikado sa cash incentive kinihanglan nga ang Barangay Tanod kini makalampos sa mandatory training ug makapasar sa evaluation sa Department of Interior and Local Government nga ang tumong mao ang pagprofessionalize sa tanang mga Barangay Tanod para sila adunay igong kahibalo ug katakos nga mobuhat sa ilang mga responsibilidad.