Subling nagpatrolya ang mga health marshals nga gipangulohan nila City Health Officer Dr. Maria Sarah B. Talla og City Executive Assistant for Security Concerns retired General Rey Lyndon Lawas batok sa mga malapason sa protocols batok COVID-19.
Ang siyudad sa Dumaguete gipaubos sa Modified Enhanced Community Quarantine (MECQ) diin mas gipahugtan ang pagpatuman sa mga health protocols lakip ang kanunay nga pagamit ug face masks, pagdili sa panagtapok sa katawhan lakip na ang pagbutang ug mga temperature check, alcohol ug makanunayong pagdisinfect sa mga balay patigayon ug mga tindahan.
Gidili usab ang mga kabataan gapangidaron ug kinse (15) anyos pamaba ug mga 65-anyos pataas nga maglaroy-laroy sa gawas ilang mga panimalay.
Ang makalapas sa lagda nga pagsul-ob ug face masks makabayad ug multa nga P 3 mil o kaha pagkabilanggo ug 10 ka adlaw.
Samtang ang mga patigayon nga wala magsunod sa protocols kini pamultahon o kaha hingpit nga ikansela ang business permit sa ikatulo ka kahigayon nga kalapasan.
Ang mga Health Marshals gilangkoban kini sa mga tinugyanan sa City Health Office, Philippine National Police, Traffic Management Office, Special Enforcement Unit, Department Trade Industry, City Social Welfare and Development Office, City Administrator’s Office and Bureau of Fire Protection.