Gibana bana nga 2, 400 na ka senior citizens ang nabakunahan batok COVID-19 sa mga tinugyanan sa City Health Office sa duha ka gitagana nga vaccination posts.
Kini walay apil pa sa kapin usa libo nga mga health workers ug frontliners ubos sa A1 nga nabakunahan na usab batok sa COVID-19.
Tungod kay aduna pay suplay nga bakuna nga nakuha si Mayor Ipe Remollo gikan sa kaulohan direkta gipadala sa Dumaguete City pinaagi ni Senator Bong Go ug Vaccine Czar Secretary Carlito Galvez, magpadayun ang pagbakuna sa mga A2 o senior citizens sa sunod nga mga adlaw.
Busa ang tanang mga senior citizens nga nagparehistro nga gihangyo nga muhulat lang sa tawag gikan sa City Health Office kung kanus-a ug asa sila moadto para sa ilang libreng bakuna.
Para malikayan ang pagtapok sa daghang tawo ug mapatunhay ang kahapsay sa dagan sa pamakuna, dili dawaton ang mga walk-in kay kinihanglan kato rang natawagan sa City Health Office ang pasudlon sa vaccination post.