Mga Health Marshals gipangulohan nila City Health Officer Dr. Maria Sarah B. Talla og City Executive Assistant for Security Concerns retired General Rey Lyndon Lawas nipahigayon na usab ug operasyon batok sa mga malapason sa protocols batok COVID-19 karung adlawa.
Ubos sa mando ni Mayor Ipe Remollo hugtanon ang pagpatuman sa pagamit ug face masks, pagdili sa panagtapok sa katawhan lakip na ang pagbutang ug mga temperature check, alcohol ug kanunayong pagdisinfect sa mga balay patigayon ug mga tindahan.
Lakip usab nga gibuyag ang mga kabataan nga galaroy-laroy bisan pa sa lagda nga tanang gapangidaron ug kinse (15) anyos pamaba ug mga 65-anyos pataas kinihanglan magpabilin lang sa kabalayan.
Ang makalapas sa lagda nga pagsul-ob ug face masks makabayad ug multa nga P 3 mil o kaha pagkabilanggo ug 10 ka adlaw.
Samtang ang mga patigayon nga wala magsunod sa protocols kini pamultahon o kaha hingpit nga ikansela ang business permit sa ikatulo ka kahigayon nga kalapasan.
Ang mga Health Marshals gilangkoban kini sa mga tinugyanan sa City Health Office, Philippine National Police, Traffic Management Office, Special Enforcement Unit, Department Trade Industry, and Bureau of Fire Protection.