Subling niapelar si City Health Officer Dr. Maria Sarah B. Talla sa mga senior citizens nga humana makaparehistro online nga muhulat kay tawagan sila binagsa para makompirma ang tukmang petsa sa ilang pagpabakuna batok COVID-19.
Kini para hapsay ang dagan sa pagbakuna sa mga senior citizens, malikayan ang pagdagsa sa mga tawo ug masigurado nga ang pagpasunod sa pagbakuna basi kini sa kinsa ang mas nauna og sayo nakaparehistro sa online link nga https://bit.ly/3tVcATY diin kompletohon ug tubag ang mga detalye.
Nagpadayun ang pagbakuna sa mga senior citizens nga unang nakapalista sa online registration ug nakadawat sa tawag gikan CHO.
Apan ang gidaghanon sa mabakunahan nagadepende usab kini sa suplay nga gikan sa DOH nga giapod-apod sa tanang lungsod ug siyudad sa Negros Oriental pinaagi sa Provincial Health Office.
Busa kung mahurot ang suplay sa bakuna, maghulat napod ang City Health Office nga hatagan ug dugang suplay sa Provincial Health Office nga pinadala gikan sa nasyonal nga kagamhanan.
Sa pagkakarun limitado pa ang suplay sa bakuna tibook Pilipinas tungod kay naningkamot ang kagamhanang nasyonal nga makapalit ug dugang bakuna gikan sa international manufacturers.
Ang online registration kini centralized sa City Health Office ubos sa pagdumala Department of Health diin didto nakalista ang tanang mga senior citizens nga ganahan magpabakuna.
Giawhag ang mga senior citizens nga hulaton lang ang tukmang pahibalo kung kanus-a ang ilang turno sa pagpabakuna batok COVID-19.