Mga kwalipikadong Barangay Tanod nakakubra na sa ilang cash incentives nga tag P 2, 100.00 dinha sa City Treasurer’s Office.
Giaprobahan ni Mayor Ipe Remollo ang cash incentive para sa mga barangay tanod sulod sa bulan sa Enero-Abril 2021 isip dugang sa ilang honorarium tungod sa ilang makanunayong pagserbisyo ug ayuda sa katawhan para mapatunhay ang kahusay ug kalinaw ilabi na karun nga ubos kita sa pandemya tungod sa COVID-19.
Adunay gigahin ang kagamhanang siyudad nga cash incentive alang sa matag Barangay Tanod nga tag P 700.00 kada bulan gikan Enero hangtod Disyembre 2021 basta makatapos sila sa mandatory training ug makapasar sa evaluation.
Matud sa DILG Dumaguete kadto lamang mga tanod nga nitambong sa training ug nakapasar sa assessment ang kwalipikadong modawat sa incentive.
Samtang ianunsiyo ra unya sa DILG Dumaguete kung kanus-a ang sunod nga training ug lecture sa uban pang mga Barangay Tanod isip parte sa ilang professionalization ug skills improvement.