Mga tinugyanan sa City Health Office gipangulohan ni Dr. Sarah B. Talla nipahigayon ug regular nga house-to-house medical mission og active case finding sa Purok 4 Barangay Batinguel niadtong adlaw nga Sabado.
Dugang kini nga serbisyong medikal alang sa mga katawhan gawas nga puede usab sila nga modangop sa City Health Office ug City Mayor’s Office para sa ayudang pinansiyal, dialysis, laboratory ug mga tambal.
Ang kalihokan gipahigayon ubos sa programang panglawas ni Mayor Ipe Remollo para ang mga lupyo sa kabarangayan mahatdan ug serbisyong medikal sa ila mismong mga panimalay ug matudloan sa mga pamaagi pagbatok ug proteksyon sa mga laing-laing sakit sama sa dengue ug COVID-19.
Sama sa naandan, nagpahigayon og check-up, nanghatag og mga bitamina, tambal ug face masks ang mga health workers sa siyudad.