Mga representante sa mga nasunogan ug panimalay sa miaging sunog dinha sa Malangsuba Bagacay ang gihatod dinha sa buhatan sa Tresorero ning siyudad para makuha nila ang ayudang pinansiyal niadtong Biernes sa hapon.
Binasihan ang listahan sa City Social Welfare and Development Office giaprobahan ni Mayor Ipe Remollo ang paghatag sa ayudang tag P 5, 000 sa tag-iya sa panimalay nga nakaagom ug kadaot samtang tag P 10, 000 para sa tag-iya sa panimalay nga naugdaw human nga miulbo ang sunog sa milabay nga semana.
Gawas nga nipadala gilayon ang kagamhanang siyudad ug pagkaon ug mga gamit ngadto sa nasunogan gipaproseso dayun sa buhatan ni Mayor Remollo ang dugang ayudang pinansiyal para makatabang sa mga biktima nga makabangon gikan sa kalamidad.
Karung sunod Domingo Marso 14, 2021, gisuportahan usab ni Mayor Remollo ang pagpahigayon usab ug Bike for a Cause para sa mga biktima sa sunog dinha sa Malangsuba.
Mga mahiligon sa pagbike sama nilang Konsehal Karissa Tolentino-Maxino, Michael Bandal, Manuel Sagarbarria, Lilani Ramon, Edgar Lentorio, Manuel Patrimonio, Liga ng mga Barangay President Dionie Amores ug SK President Renz Macion ang mosalmot sa kalihokan libot sa kadalanan sa siyudad sugod alas singko sa kadlawon (5:00AM) dinha sa Burgos Street dapit Rizal Boulevard.
Gatusan ka mga mahiligon sa pagbike ang gitakda nga moapil sa Charity Ride ug ang mga hinabang nga matigom atol sa kalihokan kini ihatag isip dugang ayuda sa mga nasunogan dinha sa Malangsuba, Bagacay.