Mga opisyales sa kagamhanang siyudad gipangulohan ni Mayor Ipe Remollo giinspeksyon ang luna nga gitukoran sa halapad nga City Materials Recovery Facility (MRF) nga giandam diin ang mga basura nga nakolekta kini iproseso para sirad-an na ang dumpsite dinha sa Barangay Candau-ay.
Sulod sa City MRF ipahimutang ang Pyrolysis Machine diin iproseso ang mga nakolekta nga basura ug gam-on kining mga bricks, hollow blocks, plastic chairs ug tables lakip na ang paghimo fertilizer ug waste-to-energy.
Kung mahuman na ang subasta sa mga ekwepo ug Pyrolysis Machine ug magsugod na ang operasyon niini sa MRF hingpit nga sirad-an ang dumpsite dinha sa Candau-ay.
Lakip usab sa giinspeksyon nila Mayor Remollo, mga konsehal Karissa Tolentino-Maxino, Manuel Sagarbarria, Michael Bandal, Edgar Lentorio Jr., Lani Ramon, Manuel Patrimonio, Liga President Dionie Amores, SK President Renz Macion, City Legal Officer Manuel Arbon, City DILG Officer Christopher Pastor, Poblacion 8 Kapitan Maelyne Mariano ug Looc Kagawad Inah Lozada mao ang luna ug dalan nga agian unya sa mga sakayanan ug mga tigkolekta sa basura.
Samtang gahulat usab ang siyudad sa DENR nga aprobahan ang sanitary landfill nga itukod usab sa parehong 8 ka ektarya nga luna nga gipalit sa siyudad pa mahimo nga Ecological Park.
Laraw sa administrasyong Remollo nga hingpit ng masirad-an ang Candau-ay dumpsite ug mahatagan ug malungtaron nga solusyon ang pila na ka dekada nga problema sa basura.
Hinoon subling gipasidan-an ang mga residente, establisyemento ug mga barangay nga disiplinahon ang kaugalingon ug sundon usab ang balaod sa waste segregation diin bahigon ang ilang mga basura ngadto sa malata (biodegradable), dili malata (non-biodegradable), mapuslan (recyclable), dili mapuslan (residual).
Kini lang ang malungtaron nga solusyon o pamaagi para magpabiling hinlo, himsog ug padayon ang paglambo sa siyudad sa Dumaguete.