Basi sa ihap sa mga social workers sa City Social Welfare Development Office nga gipadala ni Mayor Ipe Remollo, gitaho nila nga 17 ka balay ang naapektohan sa sunog nga niulbo dinha sa Malangsuba Barangay Bagacay ganinang hapon.
Si Konsehal Edgar Lentorio Jr. niuban usab sa mga social workers nga gaihap ug giila kung kinsa ang mga tag iya sa panimalay nga nasunog ug dad-on unta sila sa evacuation center apan mas gipili sa mga biktima sa sunog nga magpabilin sa lugar nga kanhi gitindogan sa ilang mga panimalay.
Gihatdan sa mga food packs sa kagamhanang siyudad ang gibana-bana nga 76 ka indibidwal nga apektado sa kalamidad ganina.
Matud ni Mayor Remollo sugdan usab gilayon ug pagproseso ang ayudang pinansiyal sa mga biktima nga nawad-an ug panimalay.
Mga kabumberohan sa siyudad malamposon nga napakgang ang pagkuyanap sa sunog dinha sa Malangsuba Barangay Bagacay.
Dikit-dikit ang kabalayan sa nahimutangan sa sunog apan ubos pagpaningkamot sa City Bureau of Fire ug tinabangan sa katawhan napalong ang sunog karung hapon.