Gibuksan na sa trapiko ang taytayan dinha sa Colon nga gasumpay sa Barangay Taclobo ug Barangay Bagacay samtang giandam na ang pagsemento sa dalan paingun sa maong tulay.
Matud ni Mayor Ipe Remollo kining taytayan sa Colon og ang ikaduhang tulay dinha dapit sa BIR puro gipondohan sa lokal nga kagamhanan isip tubag sa pila na ka dekada nga pangandoy sa katawhan ning siyudad nga makatukod ug mga konkreto ug habog nga mga taytayan para kanunay nga hapsay ug luwas ang biyahe bisan pa kung daot ang tiempo o adunay baha.
Mahinumduman nga kada baha molapaw sa mga tamborong ang tubig diin mamilegro ang kinabuhi sa mga motorista o kaha lunopon ang mga panimalay daplin sa suba sa Banika.
Ang ikaduhang tulay nga gitrabaho dinha dool sa BIR mosumpay kini sa Barangay Batinguel ngadto Barangay Bagacay og Barangay Junob.
Kung matapos na usab ang duha ka taytayan kini makahatag usab ug alternatibong agianan alang sa mga motorista para mamenusan ang kahuot sa trapiko dinha sa downtown area.