Mga lupyo dinha Barangay Taclobo ug Bagacay anam-anam ng gagamit sa halapad ug kongkretong taytayan sa Colon diin dool na kini nga mahuman ilabi na kung masemento na ang dalan sa isig kabahin sa tulay.
Matud ni Mayor Ipe Remollo kining taytayan sa Colon og ang ikaduhang tulay dinha dapit sa BIR puro gipondohan sa lokal nga kagamhanan isip tubag sa pila na ka dekada nga pangandoy sa katawhan ning siyudad.
Ang tulay nga gitrabaho dinha dool sa BIR mosumpay kini sa Barangay Batinguel ngadto Barangay Bagacay og Barangay Junob.
Kining duha ka tulay tipik ug kabahin sa laraw ni Mayor Remollo nga mohatag ug malungtaron nga sulbad sa kanunay nga pagbaha dinha sa lugar ug dugang alternatibong agianan alang sa mga motorista para mamenusan ang kahuot sa trapiko dinha sa downtown area.
Kung mahuman na ang duha ka tulay masiguro nga luwas na unya ang motorista nga molabang sa suba sa Banica bisan pa kung adunay baha o daot ang tiempo.
Mahinumduman nga kada baha molapaw sa mga tamborong ang tubig diin mamilegro ang kinabuhi sa mga motorista o kaha lunopon ang mga panimalay daplin sa suba sa Banica.