Mga health workers pinangulohan ni City Health Officer Ma. Sarah B. Talla nipahigayon sa regular nga medical mission para sa mga lupyo dinha sa Purok Gumamela ug Purok Yellowbells sa Barangay Bagacay batok dengue og COVID-19 kagahapong adlawa.
Kining house-to-house nga medical mission gipahigayon sa City Health Office isip pagsanong sa direktiba ni Mayor Ipe Remollo nga duawon ang mga panimalay para mahatagan ug serbisyong medical ang mga lupyo, ma inspekyon ang kabalayan ug tudloan ang mga lupyo kung unsaon nga malikay sila sa dengue ug COVID-19 lakip na ang paghatag ug mga libreng face masks.
Matud ni Dr. Talla kining kampanya batok dengue og COVID-19 kinihanglang adunay makanunayong pagpasabot ug pagpalapnag sa mga kasayuran ug gimbuhaton para luwas ang mga pamilya batok sa mga sakit.
Subling gitataw nga kanunay maghinlo ang mga lupyo sa ilang balay ug palibot para dili puy-an ug lamok; kanunay maghugas ug kamot ug mogamit ug face masks.
Dugang pa ni Dr. Talla ang house-to-house medical mission nagdala ug libreng tambal, bitamina, face masks ug konsultasyon para sa nanihanglan ilabi na kadtong adunay mga gihambin nga balatian o sakit nga wala namatyagan o gidala sa tambalanan.