Makigsabot si Mayor Ipe Remollo sa tag-iya sa luna diin nahitabo ang sunog dinha sa Purok Lunoy Barangay Junob para makuha ang pagtugot kung puede nga tukuran ug housing project para sa halos 30 ka pamilya nga nasunogon.
Uban sa mga opsiyales sa Barangay Junob sama nila Kapitan Maximiano Umbac ug kanhi Kapitan karun Kagawad Isagani Bana, nibisita si Mayor Remollo ganinang hapon sa mga biktima sa sunog para masuta ang mga panihanglanon sa mga biktima.
Nagdala si Mayor Remollo og mga face masks ug face shields para iapod-apod sa mga lupyo kontra COVID-19.
Niadtong lunes gimandoan usab ni Mayor Remollo ang CSWD nga paspasan ang mga papeles para mahatagan ug ayudang pinansiyal ang mga lupyo nga biktima sa sunog dinha sa Purok Lunoy niadtong Lunes.
Matag usa sa pamilya nga nawad-an ug panimalay makadawat ug P 10, 000 isip ayuda gikan sa kagamhanang siyudad.
Nagpadala usab ang CSWD of relief goods lakip na mga used clothing, habol, mosquito net ug nagpakaon usab sila sa mga biktima.
Samtang ang taga City Health Office nagpahigayun ug konsultasyon ug nihatag ug mga tambal ug bitamina isip dugang ayuda sa apektadong lupyo.
Gipasalamatan ni Mayor Remollo ang tanang grupo sama sa Philippine National Red Cross og ubang mga pundok ug mga indibidwal nga nihatod ug tabang ngadto sa mga biktima sa sunog.
(Photos Choy Gallarde)