Bisan pa kung sarado ang buhatan sa City Treasurer karung Sabado og Domingo makobra ra gihapon sa mga empleyado ug COVID frontliners ang ilang Hazard Pay kay gipaagi kini sa ilang tagsa tagsa nila ka ATM.
Mapasalamaton sa kagamhanang siyudad sa Dumaguete, ubos ni Mayor Ipe Remollo, ang mga empleyado ug health workers tungod kay gigahinan ug pondo ug nadawat na nila ang hazard pay.
Tag P 500 matag adlaw ang madawat sa kada regular, casual, job order, contractual nga mga empleyado nga nitrabaho niadtong Abril 3-30 diin gipaubos ang siyudad sa Enhanced Community Quarantine o ECQ. Basehan sa ihap sa adlaw ang Daily Time Record DTR sa usa ka empleyado pinasubay kini sa patakaran gikan sa Department of Budget and Management o DBM.
Gipasalamatan ni Mayor Remollo ang Konseho sa siyudad tungod sa pag aprobar sa P 18. 5 milyon isip pondo nga gigamit para mahatag ang hazard pay ngadto sa mga nitrabaho niadtong bulan sa Abril 2020.