Hapit na mahuman ang gitukod nga dakong Central Materials Recovery Facility o MRF dinha sulod sa walo ka ektarya nga luna nga gimugna isip City Ecological Park and Waste Processing Facility sa Barangay Candau-ay.
Matud ni Mayor Ipe Remollo kung magsugod na ang operasyon sa Central MRF kini mao na unya ang dad-an sa mga basura nga dili mapuslan ug butangan sa makinarya aron makagama ug mga plastik nga bangko ug lamesa lakip hollow blocks para magamit sa mga pampubliko nga proyekto.
Sa panahon nga sugdan na unya ang operasyon dinha sa Central MRF sirad-an na ang dul-an 30 anyos na nga Candau-ay dumpsite.
Ang mga tigkoykoy karun ug basura dinha sa dumpsite ibalhin sa Central MRF para mao ang mobahig sa mga basura nga gikan nakolekta sa mga barangay nga MRF.
Gisitar sa balaod nga ang kada panimalay kinihanglan usab nga mobahig o mosegregate sa ilang mga basura una dad-on ngadto sa barangay MRF.
Didto sa barangay MRF bahigon ang malata, dili malata, mapuslan ug ang dili mapuslan.
Unta kadto lamang mga dili mapuslan ang kolektahon sa City ENRO para dad-on didto sa Central MRF.
Busa matag panimalay, matag barangay ug ang kagamhanang siyudad adunay tagsa-tagsa ka responsibilidad para mas hapsay ug hinlo ang paghipos sa mga basura ug maprotektahan ang kalikupan ug kahimsog sa katawhan.