Mga kwalipikadong Barangay Tanod nakakubra na sa ilang cash incentives nga tag P 1, 400.00 hangtod P 2, 100.00 ganinang buntag dinha sa City Treasurer’s Office.
Ang cash incentive nga giaprobahan ni Mayor Ipe Remollo para sa mga barangay tanod sulod sa bulan sa Abril-Mayo-Hunyo 2020. Laing cash incentive ang ihatag sa sunod nga quarter (Hulyo-Agosto-Setyembre) ug para sa mga bulan (Oktubre-Nobyembre-Disyembre).
Adunay gigahin ang kagamhanang siyudad nga cash incentive alang sa matag Barangay Tanod nga tag P 700.00 kada bulan gikan Enero hangtod Disyembre basta makatapos sila sa mandatory training ug makapasar sa evaluation.
Apan gipasabot sa buhatan sa DILG, adunay mga Barangay Tanod nga nakakuha ug P 1, 400 imbes nga P 2, 100 tungod kay sila wala makatapos sa training ug makapasar sa evaluation nga gipahigayon sa ilang buhatan ubos sa program nga iprofessionalize ang mga barangay tanod.
Kadto lamang mga tanod nga nitambong sa training ug nakapasar sa assessment niadtong Nobyembre 26-30, 2019 ang kwalipikadong modawat sa P 2, 100 samtang kadtong wala motambong sa training nakakuha lamang sa kantidad nga P 1, 400 para sa bulan nga Abril ug Mayo diin niserbisyo sila samtang ang siyudad sa Dumaguete gipaubos sa Enhanced Community Quarantine ug Modified Community Quarantine.