Gabutang na ug mga barandilya sa ibabaw samtang gi demolish ang karaan nga tamburong sa ilalom sa gigamang taytayan dinha sa Colon Extension likod sa Foundation University.
Kuntento si Mayor Ipe Remollo sa dagan sa trabaho diin gabarug na ang mismong taytayan ug gitrabaho na ang pagama sa dalan agianan pasaka sa tulay.
Gibana bana nga sa dili pa matapos ang tuig mahuman na ang taytayan ug magamit na sa mga motorista ug lupyo sa lugar para masigurado nga luwas sila bisan pa kung magbaha ang suba sa Banica. Makahatag usab kini ug alibyo sa trapiko dinha sa downtown area kay puede na kining gamiton lakturanan paingun sa Bagacay.
Samtang padayun usab ang trabaho sa taytayan dinha sa Batinguel dapit sa BIR nga mosumpay sa Barangay Bagacay ug Junob.
Giklaro ni Mayor Remollo nga pondo sa lokal nga kagamhanan ang gigamit para tukuron ang duha ka taytayan dinha sa Colon mobalor ug P 20.2 milyones ug dapit sa BIR nga mokostar ug P 31.4 milyones.
Matud ni Mayor Ipe Remollo kining pondo nga gigamit sa pagtukod sa dugay ng gipangandoy nga taytayan dinha sa Colon ug dapit sa BIR gikan sa mga magbubuhis nga gigamit ug tarung ug wala usik-usika sa atong mga opisyles para mapuslan sa katawhan mga umalabot pang katuigan.