Mga dagkong ekwipo ang gigamit para matukod ang usa ka halapad ug kongkreto nga taytayan dinha dool sa BIR diin magsanga para masumpay niini ang Barangay Batinguel ngadto Barangay Bagacay og Barangay Junob.
Halos kada adlaw gi monitor ni Mayor Ipe Remollo ang dagan sa trabaho dili lang sa taytayan duol sa BIR apil na usab ang laing proyekto sa kongkreto nga tulay dinha sa Colon likod sa Foundation University nga dako na usab ug agi.
Ang duha ka taytayan dugay na nga katuigan gipangandoy sa katawhan dinha sa Barangay Taclobo, Banilad, Batinguel ug Junob para mas luwas ug hapsay na unya ang biyahe sa mga motorista ug malikayan ang bul-og sa tubig baha nga naghatag kakuyaw sa kinabuhi sa mga lupyo sa kilid sa Banica River.
Matud pa ni Mayor Remollo pondo sa siyudad sa Dumaguete ang gigamit sa pagtukod sa duha ka taytayan tungod kay dugay paman ang proseso kung maghulat pa sa pondo gikan kaulohan.
Busa nagpasalamat si Mayor Ipe Remollo sa mga magbubuhis diin ang ilang gibayad nga buhis sa gobyerno napunta sa mga proyekto nga mapuslan karun ug molongtad pa sa mga katuigan.
Kung mahuman ang duha ka taytayan dinha sa Colon ug BIR kini dako ug tabang para momenos ang gibug-aton sa trapiko ug mas hapsay ug luwas na unya ang motorista bisan pa kung adunay baha o daot ang tiempo.
Mahinumduman nga kada baha molapaw sa mga tamborong ang tubig diin mamilegro ang kinabuhi sa mga motorista o kaha lunopon ang mga panimalay dinha dool sa suba sa Banica.