Nakigpulong si Mayor Ipe Remollo, Vice-Mayor Alan Gel Cordova ug City Legal Officer Manuel Arbon sa hepe sa PNP Dumaguete Lt. Col. Mark Gifter Sucalit ug pangulo sa HPG nga si Captain Silvestre Cenia diin gipresentar ni Mayor Remollo ang mga suhestiyon ug laing kapilian sa shields/barrier nga gamiton sa magti-ayon nga mag backride ug motor.
Gituki nila Mayor Remollo ug mga opsiyales sa PNP ang laing klase nga shields o taming sama sa nipis nga acrylic plastic sheet nga kini praktikal, mas barato, mas luwas ug malikayan nga madakpan.
Kahinumduman nga nimando ang Department of Interior and Local Government nga ipatuman na ang patakaran sa National Inter-Agency Task Force for the Management of Emerging Infectious Diseases nga tugutan pag-usab ang magtiayon nga maglastihanay basta adunay taming o abong nga gamiton taliwala nila o sa likod sa drayber.
Ang Philippine National Police ug HPG ang mopatuman sa lagda sugod karung Hulyo 27, 2020 human sa lugway nga gihatag ni DILG Secretary Eduardo Año kutob Hulyo 26 o karung Domingo.
Tumong sa National Task Force ug DILG nga ipatuman ang barrier/shields sa mga ga-angkas ug motor para mapakgang ang pagkuyanap sa COVID-19.
(Photos Courtesy of Choy Gallarde)