Humana ug buhos ug semento sa slabs ug salog sa taytayan ang kontraktor nga gatukod sa imprastraktura dinha sa Colon Extension likod sa Foundation University.

Gitinguha ni Dumaguete City Mayor Ipe Remollo, bisan pa sa COVID-19, nga mahuman kining taytayan para adunay permanenteng alternatibong agianan ang mga lupyo ug motorista bisan pa kung adunay baha para mamenusan ang trapiko dinha sa downtown area ning siyudad.

Laing prayoridad ni Mayor Remollo nga mahuman ang mas dako nga taytayan dinha sa may Bureau of Internal Revenue sa Batinguel diin gapadayun usab ang trabaho niini.

Kung mahuman na ang mga taytayan, mas luwas na unya ang mga motorista ug mga lupyo daplin sa suba sa Banica diin sila kanunay naa sa kakuyaw kung molapaw ang tubig-baha sa kanhi dike ug tamborong hinungdan nga mabahaan ang mga panimalay duol sa suba.

Gapsalamat si Mayor Remollo sa mga magbubuhis tungod kay kwarta sa lokal nga kagamhanan ang gigamit nga pondo para sa duha ka dagkong proyekto nga dugay ng gipangandoy sa katawhan ning siyudad.