Subling gipasabot ni Mayor Ipe Remollo nga ang ayudang tag 25 kilong bugas kada benepisyaryo alang lamang kini sa mga panimalay nga wala nakadawat sa Social Amelioration Program (SAP) og Unconditional Cash Transfer (UCT).

Mahinumduman nga bag-o lang nipalit ang kagamhanang siyudad ug halos trienta (30) mil ka sako nga tag 25 kilos nga bugas isip ayuda atong mga panimalay nga na disqualified modawat sa SAP ug UCT tungod kay strikto ang mga rekisetos.

Kini ang ikatulong higayun nga mihatag ang kagamhanang siyudad ug ayudang bugas sa katawhan taliwala sa COVID-19 pandemic.

Apan matud ni Mayor Ipe Remollo nay posibilidad nga mohatag ang kagamhanang siyudad ug dugang ayudang bugas sa ika-upat na unya nga higayun kung magpadayun pa ang krisis sa COVID-19.

Sama sa una ug ikaduhang hugna nga hataganay ug tag 5 kilos nga bugas diin alang kini sa tanan nga lupyo sa barangay, ang mga opisyales sa 30 barangay ra gihapon ang gitugyanan nga molista sa mga panimalay nga angayan hatagan sa ayuda ug kini iverify kung wala bay gadoble o kaha nasagol nga nakadawat ug SAP.

Aduna pay unom ka barangay ang wala pa nakahatag sa tag 25 kilos nga bugas ug sila takda nga mo apod apod ini sa moabot nga mga adlaw.

Busa gi-awhag ang mga residente sa ubang barangay nga maghulat lamang sa tukmang pahibalo gikan sa ilang mga opisyales kung kanus-a ang petsa sa pagpanghatag sa ayudang bugas human mapinal ang lista sa mga panimalay nga kwalipikadong hatagan.