Gipabalo ni Mayor Ipe Remollo nga nihangyo na daan ang lokal nga kagamhanan sa mga kadagkoan sa National IATF gipangulohan ni Presidente Rodrigo Duterte nga tugutan ang pedicab sa Dumaguete nga mopasakay ug duha ka pasahero basta adunay plastik nga taming isip proteksyon sa drayber ug mga pasahero.

Tutal matud ni Mayor Remollo lapad ang atong mga pedicab ikumparar sa Manila ug sa laing dagkong siyudad.

Kini ang gipabalo ni Mayor Remollo atol sa iyang pulong sa mga sa mga lideres sa nagkalain-laing hugpong sa mga drayber ug operator og pedicab/traysikel niadtong Sabado sa hapon uban nila ni Konsehal Michael Bandal, Police Captain Saturnino Sedigo Jr. sa HPG, Police Captain Fortunato Villafuerte sa Dumaguete PNP ug Gilbert Ablong sa Traffic Management Office para mas masabtan ang pagpatuman sa mga lagda isip proteksyon batok sa COVID-19 sa kadalanan basi sa mando sa kaulohan.

Lakip usab nga gihangyo ni Mayor Remollo sa National IATF nga tugutan ang backrider sa motorsiklo basta lang pareho nga ga face mask o face shields ang mga sakay niini isip panagang sa pagkalat sa COVID-19.

Atol sa pulong niadtong Sabado gipa-ambit usab ni Mayor Remollo ang mga proyekto sa siyudad nga makatabang sa sektor sa transportasyon:

1. Padayun ang pag-abri ug pagsemento sa mga kadalanan ug pagtukod ug duha ka konkretong taytayan dinha sa Colon ug dool sa BIR para puhon mas maluag ang trapiko
2. Pagpaningkamot nga maapil ang kadaghanang drayber sa Social Amelioration Program (SAP)
3. Kadtong wala maapil sa SAP gihatagan ug ayuda gikan sa siyudad nga tag P 2, 500 kada usa
4. Ayudang bugas nga gipanghatag sa kada panimalay sukad nagsugod ang krisis sa COVID-19

Ang pulong kini gi-organisa ni Sectoral Desk Officer Albert Aquino para matuki ang mga isyu labot sa transportasyon ilabi na tungod kay dili unta uyon ang mga drayber og operator sa nasudnon nga patakaran nga usa lang ka pasahero ang makasakay tungod kay momenus ang ilang kita.

Gipasabot ni Mayor Remollo nga isip sakop sa PNP nagtuman lang usab ang mga pulis sa mando nga gipakanaog gikan sa buhatan sa National Inter-Agency Task Force on Emerging Infectious Diseases (IATF) nga gipangulohan ni President Rodrigo Duterte.

Temporaryo lamang ang patakaran nga gipatuman sa Philippine National Police samtang gipaubos ang siyudad ug probinsya sa General Community Quarantine (GCQ).

Andam si Mayor Remollo nga regular nga makigpulong sa mga lideres sa sektor sa tranportasyon para mapadayun ang hapsay nga relasyon tali sa mga traffic enforcers ug mga drayber/operator.