Padayun ang trabaho para magtukod ug usa ka kongkreto ug halapad nga taytayan dinha dool sa BIR diin mosumpay kini sa Barangay Batinguel ngadto Barangay Bagacay og Barangay Junob.

Matud pa ni Mayor Ipe Remollo gipadayon ang trabaho sa taytayan dinha BIR dungan pod dinha sa Colon para mapaspas ug mamahimong magamit na ang mga taytayan sa dili pa unta matapos ang tuig.

Kini isip tubag sa pila na dekada nga yango-ngo sa katawhan nga motukod ug halapad ug konkreto nga mga taytayan para sa luwas nga pagbiyahe.

Ang taytayan dinha sa Colon kini mokostar og gibana-bana nga P 20 milyones diin ang kontraktor mao ang Joint Venture sa Jaime Ching Enterprises ug Supreme Mega Structure Builders Inc. samtang ang budget sa ikaduhang taytayan dinha dool sa BIR mokabat ug P 31 milyones diin ang kontraktor nga PhilSouth Builders ang nagpatuman niini.

Ang pondo kini gikan tanan sa lokal nga kagamhanan.

Kung mahuman ang duha ka taytayan dinha sa Colon ug BIR kini dako ug tabang para momenos ang gibug-aton sa trapiko ug mas hapsay ug luwas na unya ang motorista bisan pa kung adunay baha o daot ang tiempo.

Mahinumduman nga kada baha molapaw sa mga tamborong ang tubig diin mamilegro ang kinabuhi sa mga motorista o kaha lunopon ang mga panimalay dinha dool sa suba sa Banica.

Laraw ni Mayor Remollo nga hatagan ug malungtaron nga sulbad ang kanunay nga pagbaha dinha sa lugar og mahatagan ug alternatibong agianan ang mga motorista para dili modugang sa kahuot sa trapiko dinha sa downtown area.

Ubos sa General Community Quarantine (GCQ), gitugotan ug padayun ang mga construction works basta ang mga trabahante distansiya lang, kanunay gahugas sa kamot ug gasul-ob ug mga face masks.