Gi-quarantine suhod niadtong Biernes ang mga tupad nga silingan sa 39-anyos nga babaye nga gikatahong positibo sa COVID-19 dinha sa Purok Malangsuba diin ang mga opsiyales sa Barangay Bagacay hugtanon nga gabantay para walay laing makasulod sa komunidad.

Nagpadala ug hinabang nga pagkaon si Mayor Ipe Remollo sa mga gi-quarantine dinha sa Malangsuba. Nagapahigayun usab ug check-up og nihatag ug tambal ug bitamina ang grupo ni City Health Officer Dr. Maria Sarah Talla atong Sabado.

Samtang matud ni Mayor Ipe Remollo, basi sa opinyon ni City Health Officer Ma. Sarah B. Talla adunay posibilidad nga sa Negros Oriental Provincial Hospital COVID-19 ward nakuha sa 39-anyos nga babaye ang sakit tungod kay wala siyay history of travel og wala pod kaso dinhe sulod sa siyudad sa Dumaguete.

Base sa imbestigayon sa mga tinugyanan mao kini ang subay sa panghitabo:

Mayo 23, 2020 – gidala sa NOPH ang 39-anyos nga babaye

May 26, 2020 – gikuhaan siya ug swab sample para RT-PCR test

Mayo 29, 2020 – gipagawas na ang pasyente uban sa discharge summary diin gilatid ang
iyang final diagnosis: community acquired pneumonia-moderate risk, congestive heart failure, dysfunctional uterine menstruation apan COVID-UNLIKELY

Mayo 29- Hunyo 3 – naka quarantine sa iyang balay ang 39-anyos nga babaye

Hunyo 4, 2020 – Gipamahayag ni Dr. Liland Estacion nga nagpositibo ang 39-anyos nga babaye

Human nahibal-an sa City Health Office gikan ni Dr. Estacion nga positibo ang resulta sa swab test giadto gilayon ni Dr. Sarah B. Talla ang pinuy-anan sa 39-anyos nga babaye para pasabton sa ilang kahimtang ug kinihanglan siya nga ibalhin uban ang iyang pamilya ngadto sa Isolation Center sa Barangay sa samang adlaw niadtong huebes.

Gipahigayon ang contact tracing nila Dr. Talla ug naka quarantine karun ang mga tapad nga silingan lakip na usab ang mga Health Workers ug frontliners nga nagmonitor sa 39-anyos nga babaye human kini siya gi-release sa NOPH.

Gipailalom usab sa ikaduhang swab test ang 39-anyos nga babaye samtang ang iyang bana ug anak kini usab gikuhaan ug sample para RT-PCR.

Nanghinaot si Mayor Remollo nga makalingkawas ang 39-anyos nga babaye ug magnegatibo usab ang iyang bana ug anak.

Gusto ni Mayor Remollo nga mahimong leksyon ang kaso sa 39-anyos nga babaye para mas mag-matngun og alerto ang mga tinugyanan para malikayan ang susamang panghitabo.